Activity Box
Beweegen, spillen, liesen, zesumme sinn!
D’Activity Box bitt Iech an Äre Kanner tëscht 1 an 3 Joer allerlee Iddien an Aktivitéiten, fir eng bildschiermfräi Zäit – doheem oder ënnerwee – ze genéissen.
All Eltere vu Kanner am Alter vun 1 bis 3 Joer dierfe gratis eng Activity Box bestellen an se an ee vun den Eltereforen uechtert d’Land siche kommen. All Famill huet Usproch op 1 Activity Box.
Wat muss ech maachen?
Mellt Iech am Agenda fir ee vun den Eventer „Ofhuelung Activity Box: Beweegt Iech, spillt, liest, sidd zesummen!“ un. ».
Wann dir keen RVD fannt deen Iech passt, da kuckt w.e.g. reegelméisseg eran, et komme lafend nei RDV’e bäi.
Wat ass alles dran a wéi kënnt Dir et notzen?
Eng Wallis voller Iddien! D’Activity Box ass eng flott Saach, fir mat op d’Rees ze huelen: bei d’Boma, bei Kolleegen, bei den Dokter, an de Restaurant asw. Als Alternativ zum Bildschierm bitt si allerlee Iddien, fir sech ze ameséieren an ze beschäftegen.
Um Deckel wimmelt et! Den Deckel vun dëser Wallis ass e Wimmelbild. Aacht kleng Figure verstoppen sech op dësem Bild. Sicht se, entdeckt se a beschreift se!
Gitt op d’Rees mam Will a mam Mich! Am Billerbuch „De Will an de Mich“ huelen Iech de Will (de klengen Af) an de Mich (de klenge Fuuss) mat an hir Welt. Dës Geschicht ass voller Iddie fir ze spillen, sech ze beweegen an Neies ze entdecken.
Spillt Ären eegene Poppentheater! D’Läppercher kënnen als Handpoppe genotzt ginn. Et sinn de Will an de Mich aus der Geschicht. Si kënne benotzt ginn, fir de Kanner d’Geschicht ze erzielen oder hëllefen, Momenter wéi déi vum „sech wäschen“ spilleresch ze gestalten.
Wierfelt a beweegt Iech! Mam Beweegungswürfel kënnt Dir ëmmer nei Beweegungsübungen ausprobéieren.
Moolt iwwerall! Fir mol méi laang Waardezäiten ze iwwerbrécken, z. B. am Restaurant oder beim Dokter, ass e Molbuch mat Bläistëftsfaarwen an der Wallis.
Spaass mat der Raup Pastell! Fir ze triwwelen an ze spillen, huet sech déi kleng Raup Pastell aus Holz an dëser Wallis verstoppt.
Verkleet, verstoppt a kuschelt Iech! Mam Spillduch ka geschmuust, gedanzt, sech verstoppt a sech verkleet ginn. De Spilliddie si keng Grenze gesat.
Plaz fir weider Spillsaachen! Niewent all de flotte Saache bleift an der Wallis nach genuch Plaz fir eege Spiller, Bicher oder de Liblingspetzi.
7 Tipps fir eng gesond Screen-Life-Balance! Am Elterebréif fannt Dir 7 Iwwerleeungen zu dem gesonden Ëmgang mat Ecranen an engem alldeegleche Gläichgewiicht zu Spill, Liesen, Beweegen, Entdecken an Erfarunge sammelen.
Um Flyer sti weider Informatiounen iwwert de Service Eltereforum:
- wou Dir eis fannt,
- wat mir ubidden,
- wéi mir Iech bei Ären alldeegleche Froe beroden a begleede kënnen.
Lidd a Reim
Lidd a Reim aus dem Buch „Sang a sprang mat mir“ vum Martine Majerus an Dominique Steiner.
Audioopnamen: Dominique Steiner
Klavier: Jos Majerus
Gittar: Riaz Khabirpour
Bass: Marc Demuth
Perkussioun Benoît Martiny
Tountechnik Michael Flick
Feedback
Wéi gefält Iech d’Activity Box? Deelt Är Andréck mat eis!
D’Activity Box gouf am Kader vun der Campagne Screen-Life-Balance vum Ministère fir Educatioun, Kanner a Jugend entwéckelt.
Esouwuel d’Valise wéi och d’Pixi-Buch, de Beweegungswürfel an d’Molbuch sinn an Zesummenaarbecht mat der Illustratrice Lynn Cosyn entstanen.
Zesummegestallt gouf d’Activity Box mam Atelier protégé vum Bieschbecher-Atelier.