Eng Plaz fir all Elteren

Eise Service riicht sech un all Elteren, Grousselteren, Tutoren an no Familljememberen, onofhängeg vun hirer Familljesituatioun, hirem sozialen oder kulturellen Hannergrond, hirem Wunnuert, hirer sexueller Orientéierung oder engem spezifesche Besoin.

Mir berücksichtegen d’Besoine vun den Elteren jee no Entwécklungsphas vum Kand – vun der Schwangerschaft an der fréier Kandheet (0–3 Joer), iwwer d’Kandheet (4–12 Joer) bis an d’Jugend (13–18 Joer).

Eis Begleedung baut op de Ressourcen vun den Elteren op a mécht hir Kompetenzen a Stäerkte siichtbar. D’Eltere gi gestäerkt a begleet, dobäi gi si an hir aktuell Liewenssituatioun berücksichtegt. Mir ginn dovun aus, datt gestäerkt a sécher Elteren hir Kanner besser begleede kënnen.

Eis Interventioune sollen esou fréi wéi méiglech usetzen an éischt Zeeche vu Schwächten oder Schwieregkeeten fréi erkennen. Besonnesch Opmierksamkeet gëllt der Schwangerschaft an den éischten dausend Deeg vum Liewe vum Kand.

Mir engagéieren eis, d’Ëffentlechkeet souwéi institutionell a politesch Acteuren fir d’Thema Eltereschaf an d’Wichtegkeet vun der Elterenënnerstëtzung ze sensibiliséieren. Mir informéieren d’Elteren iwwer hir Rechter a Verantwortung an iwwer déi Servicer an Ënnerstëtzungsmoossnamen, déi si betreffen. Mir lauschteren den Elteren no, erfaassen hir Besoinen an Uleies an integréieren dës an eis Missioun.

D’Membere vun eisem multidisziplinären Team (intern an extern Fachleit) hunn eng Ausbildung an/oder Erfarung an engem Beräich am Zesummenhang mat der Eltereschaf. Si hunn Zougang zu Ressourcen, Austausch, Reflexioun a kontinuéierlecher Weiderbildung. Si schaffen zesummen, fir datt d’Elteren vun hire komplementäre Kompetenze profitéieren. Mir féieren quantitativ a qualitativ Evaluatiounen duerch an notzen de Feedback, fir eis Offer unzepassen an hir Wierksamkeet ze iwwerpréiwen.

Eis Interventioune ginn zesumme mat den Elteren entwéckelt a respektéieren d’Eenzegaartegkeet vun all Famill. Si baséieren op Nolauschteren an Austausch, ouni Uerteel oder Zwang. Si stäerken d’mënschlech Bezéiungen, den Informatiounsaustausch an d’gemeinsam Sich no Léisungen.

Eis Treffpunkten an digital Plattformen si barrièrefräi, begréissend a bidden e séchert Ëmfeld fir Familljen a Fachleit. Si erméiglechen den Austausch vun Informatiounen, Erfarungen a gudde Praktiken a stellen den Elteren ausgewielte Ressourcen zur Eltereschaf zur Verfügung.

Mir ënnerstëtzen a begleeden d’Elteren an hirer Eltereroll am Kader vun eise fachleche Kompetenzen a vermëttelen si, wann néideg, un zoustänneg Expertinnen an Experten.

Mir fërderen d’Gläichstellung vun de Geschlechter an der Eltereschaf a respektéieren d’Diversitéit an all hire Formen.

Mir droen zum gudde Matenee bäi, andeems mir e gerechten Zougang zu Ressourcen a Servicer garantéieren, all Kulturen abezéien an vulnerabel Famillje besonnesch ënnerstëtzen.

Eis Ekippe schaffe mat lokalen, regionalen, nationalen an internationale Partner zesummen, fir d’Begleedung vun den Elteren ze stäerken an als Facilitateur am Beräich vun der Eltereschaf zu Lëtzebuerg ze wierken.

Wéinst der grousser Villfalt un Approchen an Disziplinnen am Beräich vun der Eltereschaf ass et eis wichteg, eng oppen a wuelwollend Haltung anzeschloen, déi eng Diversitéit u Ressourcen integréiert. Mir observéieren d’Entwécklunge ronderëm d’Eltereschaf permanent a verstinn eis als eng léierend Organisatioun.